ಸಮಾಜ ಸೇವೆ, ವ್ಯಸನಮುಕ್ತ ಸಮಾಜ ನಿರ್ಮಾಣದ ಕನಸನ್ನು ಇಟ್ಟುಕೊಂಡು ಮುಂದೆ ಸಾಗುತ್ತಿರುವ ಎಸ್.ಬಸವರಾಜು ಅವರು ಮೈಸೂರು ನಗರದ ಕೆ.ಜಿ.ಕೊಪ್ಪಲಿನ ಎಂ.ಸೋನಿ ಕರೀಗೌಡ ಮತ್ತು ಬಸಮ್ಮ ದಂಪತಿಗಳ ಮೊಮ್ಮಗ. ತಂದೆ ನಿವೃತ್ತ ರೆವಿನ್ಯೂ ಅಧಿಕಾರಿ ಕೆ.ಶ್ರೀನಿವಾಸ್. ತಾಯಿ ಚೆನ್ನಮ್ಮ. ಇವರ ಎರಡನೇ ಮಗನಾಗಿರುವ ಬಸವಣ್ಣ ಅವರು ಓದಿದ್ದು 10ನೇ ತರಗತಿ ಮಾತ್ರ. 10ನೇ ತರಗತಿಯಲ್ಲಿ ಇದ್ದ ಸಮಯದಲ್ಲಿ ಕೆಲ ಕೆಟ್ಟ ಸ್ನೇಹಿತರ ಸಹವಾಸ ಮತ್ತು ಕೆಟ್ಟ ವಾತಾವರಣಕ್ಕೆ ಸಿಲುಕಿದ ಬಸವಣ್ಣ ಅವರು ಬಾಲ್ಯಾವಸ್ಥೆಯಲ್ಲೇ ಕುಡಿತ ಚಟಕ್ಕೆ ಬಲಿಯಾಗುತ್ತಾರೆ. ಇದಾದ ಬಳಿಕ ಬಸವಣ್ಣ ಅವರು ಮಾಡಿದ ವ್ಯಾಪಾರ-ವ್ಯವಹಾರದಲ್ಲಿ ನಷ್ಟ ಉಂಟಾಗಿ ಸಂಪೂರ್ಣವಾಗಿ ವ್ಯಸನಕ್ಕೆ ದಾಸರಾಗುತ್ತಾರೆ.

ಇದೇ ರೀತಿ ಸಾಗುತ್ತಿದ್ದ ಪಯಣದಲ್ಲಿ 2015ರಲ್ಲಿ ಬದಲಾವಣೆ ಪರ್ವ ಶುರುವಾಗುತ್ತದೆ. ಈ ಸಮಯದಲ್ಲಿ ವ್ಯಸನಕ್ಕೆ ದಾಸರಾದ ವ್ಯಕ್ತಿಗಳನ್ನು ವ್ಯಸನಮುಕ್ತ, ಪುನರ್ವಸತಿ ಕೇಂದ್ರಗಳಿಗೆ ಸೇರಿಸುತ್ತಾರೆ. ಅವರನ್ನು ಕುಡಿತದ ದಾಸ್ಯದಂದ ಹೊರ ತರವ ಕೆಲಸ ಪ್ರಾರಂಭ ಮಾಡುತ್ತಾರೆ. ಇದರ ಜತೆ ಜೊತೆ ಜೊತೆಗೆ ವ್ಯಸನದಿಂದ ಹೊರ ಬಂದವರಿಗೆ ವ್ಯಾಪಾರ, ವ್ಯವಹಾರ ಮಾಡಲು ಆರ್ಥಿಕವಾಗಿ ಸಹಾಯ ಮಾಡುತ್ತಾರೆ. ಕುಡಿತ ಬಿಟ್ಟ ಅವರ ಬದಲಾವಣೆಯೇ ಬಸವಣ್ಣ ಅವರಿಗೆ ಸ್ಪೂರ್ತಿಯಾಗುತ್ತದೆ. ಇದರಿಂದ ತಮ್ಮಲ್ಲೂ ಕುಡಿತ ಬಿಡುವ ಚಲ, ಹಠ ಹೆಚ್ಚಾಗುತ್ತದೆ. ಬಳಿಕ ಈತರ ಚಟಕ್ಕೆ ಬಲಿಯಾದ ವ್ಯಕ್ತಿಗಳಿಗೆ ಪರಿಹಾರದ ಮಾರ್ಗ ಕಲ್ಪಿಸಿಕೊಡಬೇಕು ಎಂದು ನಿರ್ಧರಿಸಿದ ಬಸವಣ್ಣ ಅವರು 27/10/2019 ರಲ್ಲಿ ಉಚಿತವಾಗಿ ಕುಡಿತ ಬಿಡಿಸುವ ಶಿಬಿರವನ್ನು ಆಯೋಜನೆ ಮಾಡುತ್ತಾರೆ.